Berpirsên YNKê ligel fermandarên pêşmergeyên Hêza 70 ya YNKê civînek saz kirin û daxwaz kirin ku nebin aliyekî nakokiyên nav partiyê.
Li gorî ragihandina Hêza 70 ya Fermandariya Pêşmerge, îro (03-09-2016) Fermandarê Giştî yê Hêzên 70ê Şêx Cefer Şêx Mistefa, bi amadebûna Berpirsê Rêxistina Pêşmerge Mistefa Çavreş ligel pêşmergeyên Hêza 70 ya YNKê civînek pêkanîn.
Di civînê de Hêzên Dijî Teror, Hêzên Berevanî, Polîsên Sînor û yên Elektrîk, Petrol û Gazê, Lîwaya Teybetî ya Mam Celal jî amadebûn.
Di daxuyaniyê de hate gotin ku di civînê de 3 biryar hatine wergirtin û ev biryar jî wiha hatine rêzkirin:
1 – Hêzên Pêşmergeyên Kurdistanê hêza parastina gel û axa Kurdistanê ye. Hêza parastina yekrêziya hemû alî û pêkhateyên Kurdistanê ne.
2 – Hêza 70 ya pêşmerge, nabe aliyekê nakokiyên di nava YNKê de, dê bibe hêza çespandina çareseriyê.
3 – Hêza 70 ya pêşmerge parêzerê mîrasa xwîn û xebata şehîdan e û bi ti awayê rê nade ti aliyekê ku rêzên YNKê têk bide.
Berpirsên Hêza 70ê yê pêşmergeyên YNKê Ehmed Letîf ji Rûdawê re ragihand, di civînê de hêzan tekez kirine ku ew nabin alîgirê ti aliyekê.
Hêjayê gotinê ye ku roja 1ê Îlonê herdu cîgirên sekreterê giştî yê YNKê Kosret Resûl û Berhem Salih “Navenda Biryardanê” ragihandibûn û diyar kiribûn ku bêyî destûra vê navendê ti biryarên navxwse û derve yê partiyê nayên qebûlkirin.
Li hember vê yekê baskê din ê YNKê ku serpereştiya wê hevjîna Celal Talabanî, Hêro Îbrahîm Ehmed dike, duh civînek pêkanî bûn û ev navend weke “ne rewa” binavkiribûn.
